Arnbjørn debutmál i sannførandi sigri á Liktinstein

Arnbjørn Svensson skoraði í sínum fyrsta dysti fyri fótbóltslandsliðið, sum vann sannførandi á Liktinstein í venjingardysti í Spania.

Pætur Petersen (2) og Adrian Justinussen skutu hini málini í 4-0 sigrinum í Marbella.

Væl frá byrjan

Føroyska liðið, sum er eitt sindur skert til hesar venjingardystirnar, hevði tørv á viðgongd, og hon kom beinanvegin, tá Pætur Petersen skoraði sítt fyrsta landsliðsmál longu í 3. minutti.

KÍ-framherjin skuldi ikki bíða leingi eftir nummar tvey. Tað fekk hann í yvirtíðini av fyrra hálvleiki, tá hann vísti góðan bóltførleika inni í málteiðnum.

Adrian Justinussen byrjaði inni og spældi ein góðan dyst á føroyska miðvøllinum. Hann fekk eisini sítt fyrsta landsliðsmál, tá Brandur H. Olsen sendi hann leysan.

Í yvirtíðini skoraði innskifti Arnbjørn Svensson eftir horna úr høgru, sum Andrias Edmundsson skallaði yvirum aftur.

Góð upphiting til Danmark

Sum heild var talan um fínt avrik, har fleiri fingu víst seg fram. Eingin fekk skaða, og nú ræður um at gera seg til reiðar til dystin ímóti Danmark á Brøndby Stadion týskvøldið.