Svenska SVT vísir kringvarpsdokumentar

Sofía og djórini, sum snýr seg um Sofíu Thorsvig-Kajsdóttir, sum rýmdi heim aftur til Føroya, tá ið korona brast á, verður skjótt at síggja á svensku rásini SVT og á stroymingarsíðu teirra, SVT Play.

Avtalan við SVT er komin í lag í sambandi við Nordvision, sum er samstarv millum norðurlendskar public service-rásir, har sjónvarpstilfar verður boðið út. Hesa ferð er tað so Sofía og djórini, sum sviar hava tikið til sín.

Sendingin, sum nú eitur Tillbaka till Færøarna, verður víst á SVT 2 sunnukvøldið 14. apríl kl. 18. Hon verður eisini tøk á stroymingartænastuni SVT Play í eitt ár.

Einans íbúgvar í Svøríki kunnu síggja sendingina á netinum.

Men føroyska útgávan finst framvegis á kvf.fo og kann síggjast her.

Finnur Koba og Eyðun Müller Thomsen hava gjørt sendingina.

sofia_thorsvig.png

Nordvision-samstarvið

Nordvision er felagsskapur, sum arbeiðir fyri at styrkja public service í Norðurlondum. Limirnir eru: DR, NRK, SVT, YLE og RÚV. KNR, KVF, UR, Sveriges Radio og Ålands Radio eru hjálimir.

Tríggjar ferðir um árið – tvær ferðir um netið og eina ferð fysiskt – hittast umboð fyri rásirnar at útveksla sjónvarpstilfar, sum tey hava framleitt.

Limirnir samframleiða, útveksla sendingar, menna konsept og deila vitan sínámillum. Árliga verða á leið 4.500 sendingar býttar millum londini.