Benjamin Netanyahu: "Trýstið á Hamas skal herðast"

- Næstu dagarnar fara vit at økja hernaðarliga og politiska trýstið á Hamas, tí tað er einasti mátin, at fáa ísrelsku gíslarnar leyslatnar, sigur Benjamin Netanyahu, ísraelskur forsætisráðharrin, í einari videorøðu sunnudagin. Tað skrivar CNN. 

Ísrelski forsætisráðharrin boðaði frá, at tað fara at vera framd fleiri álop, og tey fara at raka ógvusligari, enn álopini higartil hava gjørt. Hann sigur samstundis, at atsóknirnar byrja í næstum. 

Hóast heimsins lond hava mælt frá og beinleiðis hava átalað ætlanini hjá Ísrael, hevur Netanyahu í fleiri umførum sagt, at ísrelski herurin fer at leypa á og fer inn við markið við Rafah.

Amerikanski uttanríkisráðharrin, Antony Blinken, er ein teirra, ið hevur heitt á Ísrael um at sleppa ætlanini, tí vandi er fyri, at atsóknin fer at kosta nógvum menniskjum lívi. 

Fyrranáttina vóru í minsta lagið 22 fólk dripin í Rafah av einum ísrelskum loftálopi. 18 teirra vóru børn, skrivar Ritzau.