Villleiðandi tøl frá Bakkafrosti

Tað er prosentmanipulatión, tá Bakkafrost í tíðindaskrivi sigur, at sølan hækkaði við 8 prosentum og tøkugjaldið við 295 prosentum - ein slík samabering gevur eina mynd av, at skipanin ikki hongur saman - men tað ger hon, sigur Rebekka Joensen, búskaparfrøðingur, nú Bakkafrost í tíðindaskrivi í gjár vísir á manglandi samanhang millum tøkugjald og inntøkur.

"Hóast søluprísurin so at siga er óbroyttur og sølan í hesum ársfjórðingi er lítið hækkað í mun til fyrsta ársfjórðing í fjør, so nærum trífaldaðist tøkugjaldið (295%)" var boðskapurin hjá Bakkafrosti í tíðindaskrivi til miðlarnar í gjár.

"Tøkugjaldið var 112 milliónir fyrsta ársfjórðing í ár, samanborið við 38 milliónir sama tíðarskeið í fjør og 153 milliónir fyri alt 2023" stendur m.a. í tíðindaskrivinum.

295 prosent var seinni rættað til 200 prosent, men tað er enn skeivt, sigur Rebekka Joensen, sum hevur lisið búskaparfrøði á lærda háskúlanum í Keypmannahavn og hevur skrivað serritgerð um føroysku alivinnuna.

Samanber mann røttu tølini, vísir tað nemliga, at tøkugjaldið fylgir stiganum, sigur Rebekka Joensen.