Atkvøða um fosturtøku í morgin

Í morgin fer løgtingið at atkvøða um fosturtøkuna.

Rættarnevndin hevur skrivað álit um bæði uppskotini, uppskotið hjá landsstýrismanninum í lógarmálum um fosturtøkulóg, og uppskotið hjá Miðflokkinum um ófødda barnið.

Umboðini hjá samgonguflokkum mæla til at samtykkja uppskotið hjá landsstýrismanninum.

Henrik Old í Javnaðarflokkinum tekur tó ikki undir við teimum. Hann sigur seg ikki taka undir við uppskotinum.

Henrik Old

Henrik Old, samgongulimur í rættarnevndini, tekur ikki undir við uppskotinum um fría fosturtøku. 

Skulu hava møguleika at sleppa undan

Hini í samgonguni hava tó eitt broytingaruppskot.

Tey siga, at er tað móti etisku ella átrúnaðarligu fatanini hjá løggildum heilsustarvsfólki á sjúkrahúsi at fremja ella viðvirka til fosturtøku, skulu tey sleppa undan tí.

Umboðini hjá andstøðuni mæla tinginum frá at samtykkja uppskotið um nýggja fosturtøkulóg.

Øll í samgonguni í rættarnevndini eru samd um ikki at taka undir við uppskotinum hjá Miðflokkinum um ófødda barnið.

Sí álitið frá rættarnevndini til uppskotið um fosturtøku her.

Sí álitið frá rættarnevndini til uppskotið um ófødda barnið her.