Politiið: Samarittarnir skulu hava stórt rós

Fyrrapartin í gjár varð ein bilførari tikin fyri rúsdrekkakoyring oman fyri Vestmanna, og í gjárkvøldið var ein eisini tikin fyri rúsdrekkakoyring í Havn.

Í báðum førum var blóðroynd tikin.

Nógv fólk var á Bátafestivalinum í Vestmanna, har politiið hjálpti onkrum á føtur aftur og legði ímillum í onkrum føri.

Eitt harðskapsmál er tó skrásett har, tá ið tveir mans vóru í hornatøkum og annar varð handtikin.

Tað málið verður kannað víðari.

Eisini var ein tikin fyri at bróta skilhaldsreglurnar.

- Samarittarnir, sum eru á Bátafestivalinum, skulu hava stórt rós fyri sítt ovurstóra arbeiði, sigur vakthavandi á Politistøðini í Havn.

Nakað av ófriði var í miðbýnum í Havn í gjárkvøldið, men politiið kom á staðið, og eingin illstøða spurdist burturúr.

Eisini í Norðurøkinum og Eysturoynni hava patrúljur koyrt fram við skeinkistøðunum, og hóast nógv fólk var í býnum, serliga í Klaksvík, var bara gott lag.