Fjórðu ferð ímóti Andorra

Fyrstu ferð føroysku kvinnurnar royndu seg ímóti Andorra var í innleiðandi EM-undankappingini fyri níggju árum síðani. Tá var als eingin ivi, hvønn veg sigurin skuldi fara.

Við fýra málum frá Rannvá Biskopstø Andreasen, tveimum frá Heidi Sevdal og hvør sínum máli frá Fríðrún Olsen og Lív Arge Poulsen, vunnu Føroyar 8-0, skrivar Fótbóltssamband Føroya.

Í junimánaði fyri tveimum árum síðani spældi føroyska kvinnulandsliðið tveir venjingardystir móti Andorra, sum báðir endaðu við føroyskum sigri.

Í tí fyrra, sum var á Djúpumýru í Klaksvík, vunnu Føroyar 3-1. Málskjúttarnir vóru Mona Rasmusdóttir, Jensa Tórolvsdóttir og Heidi Sevdal.

Tríggjar dagar seinni møttust liðini á Tórsvølli, og við einasta málinum í dystinum syrgdi Sanna Svarvadal fyri, at Føroyar vunnu ein tepran 1-0 sigur.

EM-undankappingardysturin millum Føroyar og Andorra fríggjadagin 31. mai byrjar klokkan 16:45. Kringvarpið sendir dystin beinleiðis í sjónvarpinum frá klokkan 16.20.