Føroyar smurdu Andorra av

Tær vildu á talvuna, og tað komu tær so sanniliga við fýra mála sigri á Andorra á Tórsvølli. 

Sunniva Willemoes Dal Christiansen, Ásla Johannesen, Birita Ryan og Petra Hoydal, sum spældi sín fyrsta dyst, skutu málini fyri Føroyar - trý teirra eftir deyðbólt.

Fult tamarhald frá byrjan

Føroyar hevði vunnið allar tríggjar dystirnar, sum landsliðið hevði spælt ímóti Andorra, og mestsum beinanvegin sást, at heimaliðið ætlaði sær hin fjórða eisini.

Tær í hvítum stýrdu dystinum, men høvdu eitt sindur ilt við at spæla seg til teir heilt stóru møguleikarnar. Tí var tað kanska ikki so løgið, at eitt horna frá frálíka vinstra beininum hjá Tórunn H. Joensen, gjørdist loysnin. 

KÍ-spælarin sendi bóltin innfyri, og har stakk Sunniva Willemoes Dal Christiansen seg upp og skallaði Føroyar framum.

Tryggjaðu sær stigini eftir steðgin

Leiðslan kundi verið størri, tí bæði Heidi Sevdal og Ásla Johannesen høvdu góðar kjansir at økja í fyrra hálvleiki, sum kortini endaði 1-0.

Eftir steðgin skuldu tey góðu 500 viðhaldsfólkini ikki bíða leingi eftir næsta málinum. 48 minuttir vóru spældir, tá Jensa Tórálvsdóttir sendi horna innfyri úr vinstru og Ásla Johannesen, sum spældi sín 50. landsdyst, fekk eitt mál í jubileumsgávu. 2-0 til heimaliðið. 

Miðskeiðis í 2. hálvleiki øktu Føroyar aftur, tá Tórunn H. Joensen sendi fríspark innfyri til KÍ-liðfelagan, Biritu Ryan, sum hegnisliga sendi bóltin í netið, og tá 11 minuttir vóru eftir at spæla, økti Petra Hoydal til 4-0 í sínum fyrsta A-landsdysti.

Grikkaland vitjar týsdagin

Føroyingarnir fegnaðust saman við viðhaldsfólkunum eftir dystin, og bæði venjarar og spælarar tóktuskt væl nøgdir við úrslitið, sum lyftir Føroyar upp á 3. pláss í bólkinum, har Grikkaland og Montenegro eru fremst við sjey stigum í part.

Júst Grikkaland vitjar á Tórsvølli týsdagin. Føroyar taptu við einum máli fyri grikkum á útivølli í apríl, og tí er ikki óhugsandi, at føroysku kvinnurnar kunnu fáa stig á heimavølli.

Tórsvøllur (EM-undankappingardystur í bólki C3)
Føroyar - Andorra 4-0 (1-0)
1-0 Sunniva Willemoes Dal Christiansen, 25 min.
2-0 Ásla Johannesen, 48 min.
3-0 Birita Ryan, 66 min.
4-0 Petra Hoydal, 79 min.