Støðan í Gaza verður verri dag fyri dag

Í løtuni heldur restin av heiminum ondina, meðan ísraelska stjórnin og Hamas gera av, um partarnir vilja taka av uppskotinum um vápnahvíld, sum amerikanarar standa fyri.

Amerikanski forsetin, Joe Biden, legði uppskotið fram í síðstu viku, har lagt verður upp til at byrja við eini seks viku vápnahvíld. Síðani skulu onnur ting fremjast í verki, so sum neyðhjálp til Gaza, ísraelsku gíslarnir skulu leyslatast og til endan skal ein loysn fyri varandi vápnahvíld finnast.

Og meðan tað verður kjakast aftur og fram, hvørt partarnir skulu taka av hesi vápnahvíldini, halda ísraelsku luftálopini á Gaza fram.

Í býnum Rafah vóru túsundtals palestinar flýddir fyri at finna friðskjól, tí har vóru sokallaðar "safe zones" - Flóttafólkalegur, har tað var trygt at vera fyri álopum. Men í farnu viku raktu ísraelskar rakettir eina teltlegu uttan fyri Rafah. Sambært palestinskum heilsumyndugleikum, sum Hamas stýrir, lótu í minsta lagi 45 sivilfólk lív og fleiri hundrað vóru særd. 

Ísrael sigur, at talan var um eitt syrgiligt óhapp, og at ætlanin var at raka tveir Hamas-limir, sum goymdu seg í Rafah.

Í Rafah er støðan langt frá haldbar fyri flóttafólkini. Flestu familjurnar flýggja nú til onnur støð í Gaza, eitt nú til býin Khan Younis. 

Sigrið Zachariasen, Reyði krossur

Frítekst tagging: 

Sigrið Zachariassen

Reyði Krossur Føroya og flóttafólk

Sigrið Zachariasen er dagligur leiðari hjá Reyða Krossi Føroyar. Hon greiðir soleiðis frá um lívið í Gaza beint nú:

Fleiri enn 36.000 fólk hava latið lív í Gaza, síðani stríðið millum Hamas og Ísrael byrjaði 7. oktober í fjør, tá vápnaðir menn frá Hamas tóku seg inn í Ísrael, drupu 1200 ísraelar og tóku 252 gíslar við sær aftur til Gaza.