ES revsar kinesiskar el-bilar við eykatolli

ES setur fyribils toll á kinesiskar el-bilar. 

Nýggi tollurin er úr 17,4 upp í 37,6 prosent, og kemur aftrat teimum 10 prosentunum, sum eru í dag. 

Tollurin kemur í gildi í morgin.

17,4 prosent í revsitolli verða løgd á felagið BYD, 19,9 prosent á Geely, sum eigur Volvo, og 37,6 prosent á felagið Saic, sum kinesiski staturin eigur.

ES-nevndin stúrir ikki fyri, at el-bilar gerast dýrari, og at hetta seinkar grøna orkuskiftinum. 

Verja evropiska bilídnaðin

- Tað snýr seg um at verja evropska bilídnaðin og arbeiðspláss, og tað gera vit á henda hátt, sigur ES-nevndin.

Nevndin leggur dent á, at el-bilaídnaðurin í Kina hevur inntøkur frá 'órættvísum stuðli' frá kinesiskum myndugleikum, og tað kann skaða framleiðarar í ES-londum.

Samrøður hava leingi verið millum umboð fyri ES og Kina, og tær halda fram, til seint í oktober, sigur ES-nevndin.

Taka ES-londini undir við varandi revsitolli á kinesiskar el-bilar, verður revsitollurin galdandi í fimm ár.

Fara at tryggja kinesisk áhugamál

ES-nevndarlimurin í handilsmálum, Valdis Dombrovskis, sigur, at hann væntar ikki, at Kina fer at svara aftur.

Kinesiskir myndugleikar siga, at teir 'fara at brúka allar møguleikar fyri at tryggja kinesisk áhugamál', skrivar Reuters.

Revsitollurin skal krevjast sum eitt slag av bankatrygd, sum skal rindast, tá ið møgulig semja verður um málið í oktober.