Fiskiskapur: Streymurin er harður, men batnar, sum vikan gongur

Tvey frystilínuskip eru við Føroyar, eitt er á Íslandsrygginum og eitt er á veg heim undan Grønlandi. 

Skipini fáa tosk, longu og brosmu. 

Seks frystilínuskip liggja við bryggju, og tað gera bæði ísfiskalínuskipini eisini.

Streymurin er harður, men batnar, sum vikan gongur. 

Ikki nógvur útróður

Veðrið verður skiftandi, so Fiskamarknaðurin væntar ikki nógvan útróður nú í vikuni.

Ein ísfiskatrolari fiskar svartkalva, ein fiskar kongafisk og ein er á Íslandsrygginum og fiskar tosk. 

Ein frystitrolari er við Føroyar og ein við Eysturgrønland. Báðir fiska svartkalva.

Brúkiligt upsafiskarí

Um partrolarar verður sagt, at trý pør fiska upsa og annan hvítfisk. 

Upsafiskaríið er brúkiligt. 

Tvey pør fiska gulllaks. 

Trolbátar eisini úti

Ein trolbátur er norðanfyri. Hann fiskar mest tosk og hýsu og nakað av flatfiski. 

Tveir trolbátar eru á landleiðini. Teir fiska mest flatfisk og tosk. Fiskaríið hjá teimum er brúkiligt. 

Tvey garnaskip fiska svartkalva, og tvey fiska havtasku. Tey hava smáligt fiskarí.