Neyðugt at tátta í við tilflyting til Føroya

Neyðugt er at tátta í við tilflytingini til Føroyar, og tað skal fyrst og fremst gerast við at endurskoða Fast track skipanina.

Sostatt kunnu vit rokna við, at tað verður truplari hjá 3. landsborgarum at fáa arbeiðs- og uppihaldsloyvi í Føroyum.

Tað sigur Bjarni Kárason Petersen, lansstýrismaður í útlendinga- og integrasjónsmálum, sum sostatt tekur undir við løgmanni og sigur, at nú verður fyrst og fremst hugt eftir Fast Track skipanini.

Ein stórur partur av útlendsku arbeiðsmegini, sum kemur til Føroya, kemur gjøgnum Fast Track skipanina, sum er fyri 3. landsborgarar - tað eru borgarar, sum ikki eru úr Norðurlondum ella ES-londum. 

Tað koma eisini nógv úr ES-londum, men har er tað ikki so einfalt hjá føroyskum myndugleikum at broyta reglurnar. 

Tí verður tað fyrst og fremst Fast Track skipanin, sum tað nú verður hugt eftir.