Útlendingastovan: Útlendskir ferðaleiðarar arbeiða uttan loyvi

Tey eru fá, sum søkja um arbeiðsloyvi at vera ferðaleiðari í Føroyum. Tí er helst talan um, at teir nógvu útlendsku ferðaleiðararnir í Føroyum arbeiða uttan loyvi.

Tað sigur Kristina Ellendersen, løgfrøðingur á Útlendingastovuni.

Føroya ferðaleiðarafelag ger nú vart við, at nógvir útlendskir ferðaleiðarar, sum ikki eru norðurlendingar, arbeiða í Føroyum og tískil bróta útlendingalógina. 

Í nøkrum førum skulu útlendskar ferðaskrivstovur hava sent ferðaleiðararnar henda vegin.

Men um útlendskar fyritøkur senda sínar egnu ferðaleiðarar til Føroya, so krevst eitt vanligt arbeiðsloyvi, sigur Kristina Ellendersen.

Útlendingastovan hevur sæð fáar umsóknir um ferðaleiðaraloyvi. Tí er sannlíkt, at hesir arbeiða uttan arbeiðsloyvi.