Vil hava linari dóm fyri neyðtøku

Ein maður, sum í Føroya rætti er dømdur fyri neyðtøku, vil hava linari revsing, enn hann fekk í Føroya rætti.

Mál hansara skal tí viðgerast í Eystari landsrætti í dag.

Maðurin, sum er fyrst í tjúgunum, fekk síðst í mai hálvtannað ára treytaleysa fongsulsrevsing í Føroya rætti.

Hann var ákærdur og dømdur fyri neyðtøku, fyri oralsex, sum hann noyddi eina javnaldrandi kvinnu til á einum vesi í einum skeinkingarstaði í Havn 10. mars í ár.

Maðurin noktar seg sekan. 

Men hann hevur ikki appellerað avgerðina hjá Føroya rætti um, at hann er sekur.

Vístur úr Føroyum

Ákæruvaldið kravdi tvey ár í Føroya rætti, og fer at krevja tvey ár aftur nú í Landsrættinum. 

Maðurin, sum er útlendingur, er vístur úr Føroyum. Hann hevur ikki loyvi til at koma higar í tíggju ár.

Maðurin var fluttur í varðhaldið, eftir at hann fekk dómin í Føroya rætti. Og har er hann enn.

Maðurin er dømdur eftir lógini um, at sex krevur samtykki.

Eftir gomlu lógini hevði hann fingið minni enn eitt ár.