Sølvi skal menna føroysku svimjingina

Sølvi Reinert Hansen er nýggi aðalskrivarin í Svimjisambandi Føroya og skal skipa og menna føroyska svimjing frameftir.

Svimjisambandið hevur ongan aðalskrivara havt í hálvtannað ár. 

Sølvi Reinert Hansen hevur drúgvar royndir í føroyskum ítrótti. Hann var sjálvur virkin íðkari og seinni hevur hann verið ráðgevi, aðalskrivari og forseti ÍSF, og limur í altjóða oyggjaleikanevndini, IIGA, skrivar Svimjisambandið.

Seinastu 13 árini hevur hann starvast sum mentanarleiðari hjá Runavíkar Kommunu. 

 - Vit vænta okkum nógv av nýggja samstarvinum, har Sølvi óivað kann læra okkum ymiskt um, hvussu Svimjisambandið kann betrast og mennast. Møguleikarnir eru mangir, millum annað vegna nýggju svimjihallirnar sum eru á veg í Havn og í Runavík, skrivar ssf.

Fyrsta stóra uppgávan hjá Sølva Reinert Hansen, sum byrjaði í starvinum 1. september, er norðurlendsk ráðstevna um svimjifrálæru, sum Svimjisambandið er vertur fyri í Norðurlandahúsinum í oktober.