Vestmenningar vitja í Íslandi

Hesa vikuna hava umboð fyri Vestmanna bygdarráð verið á vinarbýarvitjan í Snæfelsbær í Íslandi.

Vestmanna kommuna tók upp vinarbýasamband í 2001, og síðani hevur samband verið millum kommunurnar báðar.

Vestmanna bygdarráð hevur vitjað Ólafsvík, Hellissand og Rif, sum eru í Snæfelsbærar kommunu.

Millum annað varð vitjað hjá eldrafelagnum í kommununi, sum heldur til í egnum húsum í Ólafsvík.

Eisini siga vestmenningar seg hava fingið íblástur frá, hvussu gøtur eru lagdar til tey ymsu ferðamálini, og hvussu tey handfara burturkast, ið kann endurvinnast.

Næsta ár er ætlanin, at umboð fyri bygdaráðið í Snæfelsbær koma á vinarbýarvitjan í Vestmanna.