Ísrael: Innrásin í Libanon er røtt

Innrásin í Libanon í nátt er ein røtt avgerð.

Tað skrivar ísraelski ráðharrin í trygdarmálum, Itamer Ben-Gvir, á sosiala miðlinum X.

- Avgerðirnar, sum eru tiknar seinastu dagarnar, eru rættar og neyðugar. Stundir eru ikki at steðga á, men vit mugu halda fram og gera alt, sum er í okkara valdi, at knúsa yvirgangsbólkin Hizbollah, skrivar ísraelski ráðharrin.

Hetta er fyrsta álopið á landi, síðani stríðið kyknaði millum Ísrael og Libanon.

Soleiðis segði Rasmus Tantholdt, útsendur tíðindamarður hjá TV2,tíðliga í morgun úr libenesiska høvuðstaðnum, Beirut:

Libanon og Ísrael, ísraelskir stríðsvognar í Libanon

Ísraelskir stríðsvognar fara um markið inn í Libanon. (Mynd: Reuters/Ritzau Scanpix)

Harðir bardagar

Í løtuni eru harðir bardagar millum ísraelska herin og Hizbollah har suðuri í Libanon, nærindis ísraelska markinum, skrivar Reuters. 

Støðan í Libanon er vanlukkulig, sigur Jens Lærke, talsfólk hjá ST fyri samskipan av neyðhjálp í økinum, við TV2. 

- Longu nú hava ein millión fólk í Libanon bráðfeingis tørv á neyðhjálp, sigur hann. 

Atsóknin hjá Ísrael hevur heitið 'Northern Arrows', og hevur til endamáls at raka yvirgangsmál hjá Hizbollah og undirstøðuskervið har suðuri í landinum, skrivar ísraelski herurin í morgun. 

Flyta ríkisborgarar úr Libanon

Bretland hevur sent flogfør til Libanon eftir bretskum ríkisborgarum, og eftir ætlan skulu øll vera flogin heim í seinasta lagi í morgin, skrivar The Guardian. 

Onnur lond eru eisini farin  at flyta sínar ríkisborgarar úr Libanon, m.a. Týskland, Kanada og Bulgaria.

Danmark heitti í síðstu viku á allar danskar ríkisborgarar at fara úr landinum.