Býráðið vil seta treytir fyri stutttíðarleigu

Tórshavnar kommuna fer nú at heita á landsstýrið um, at geva kommununi heimild at seta treytir og ásetingar fyri stutttíðarleigu, so sum útleigan á Airbnb.

Tað samtykti býráðið einmælt í gjárkvøldið.

Í landsfólkayvirlitinum standa fleiri hús í Havn at vera skrásett uttan nakran fastbúgvandi, og serliga er tað í ávísum pørtum av Havnini, sigur kommunan.

Eitt nú í gomlu Havnini. 

Fleiri av hesum húsum verða útleigað í styttri tíðarskeið. Eisini verða nýggjar íbúðir bygdar og keyptar til stutttíðarleiguendamál.

Eingin lóggáva um stutttíðarleigu

Samanborið við grannalondini er eingin lóggáva ella ásetingar um stutttíðarleigu.

Kommunan nevnir nakrir møguleikar, sum kunnu loysa trupulleikan.

Eitt nú at kann hámark setast fyri gistingar ella árliga inntøku, soleiðis at tað ikki loysir seg ov væl, samanborið við langtíðarleigu.

Sambært leitifunkuni á Airbnb vóru 987 leigumál í Føroyum síðst í august í ár.

Hetta talið er sannlíkt eitt vet hægri á hásumri, sigur kommunan.

Vaksandi tal av leigumálum

Seinastu fimm árini er talið vaksið skjótt. Í 2017 lá talið á 306 leigumálum, og í 2022 var talið komið upp á 702 leigumál.

Kommunan vísir á, at í Føroyum er eingin lóggáva ella reglugerð, sum fevnir um stutttíðarleigu gjøgnum pallar sum Airbnb.

Eisini er tað ein trupulleiki, at staðbundnar nevndir og eigarafeløg ikki seta treytir til Airbnb ella stutttíðarleigu, hóast tað er vanligt í øðrum londum.

Kommunan sigur tó, at í viðtøkunum fyri lestraríbúðirnar hjá Bústøðum í Finsen, Næmingaheiminum undir Fjalli og Studentaskúlaheiminum í Berjabrekku, stendur at ikki er loyvt at leiga ella framleia íbúðina á airbnb ella øðrum heimasíðum, har bústaðir verða leigaðir ella umbýttir.