Levi Mørk nýggjur borgarstjóri í Vági

Í Vági verður Levi Mørk nýggjur borgarstjóri.

Levi Mørk gjørdist toppskorari á valinum týskvøldið, og fór fram um Bjarna Johansen, sitandi borgarstjóra, á lista C. 

Men hóast nýggja borgarstjóran, vera tað somu flokkar, sum halda fram í býráðsmeirilutanum í Vági skrivar dimma.fo. Tað eru listi C og listi B, Javnaðarflokkurin og Sambandsflokkurin.

Dimma.fo skrivar eisini, at avtala er gjørd um, at Marin Gaardlykke tekur við sum borgarstjóri, tá helvtin av valskeiðinum er farin. 

Men tað er ikki í samsvari við lógina at skifta um borgarstjóra í hálvum valskeiði, skrivaði in.fo í gjárkvøldið, og tí verður hetta væntandi steðgað av kommunala eftirliftinunm. 

Valdur fyri alt valskeiðið

Ein borgarstjóri verður valdur fyri alt valskeiðið. Tað ber til at fara frá vegna eitt nú sjúku, men tað ber ikki til skifta borgarstjóra fyri at býta valdið javnari millum tveir flokkar, skrivar in.fo.

Marin Gaardlykke var toppskorari á lista B í Vági við 44 atkvøðum, meðan Levi Mørk fekk flestar atkvøður á lista C við 131 atkvøðum.

Tilsamans fingu listi B og C fimm umboð í Vágs Býráð, ávikavist tvey og trý umboð. 

Á valinum týskvøldið fekk fekk listi E seks atkvøður fleiri enn listi C og fýra umboð.

Listi E endar tískil í minniluta, hóast hann fekk flestar býráðssessir.