Løgreglan ávarar um hálku

Síðsta tíman hevur løgreglan fingið nógvar fráboðanir frá fólki um hálku. Tað er blivið sera hált, og hjá nógvum kemur hálkan óvart á. Sambært vakthavandi á løgreglustøðini í Havn glíða bilar, eisini um teir eru væl skøddir. Enn er tó bara ein fráboðan um samanstoytir.

Men løgreglan heitir á fólk, bæði tey í bili og tey til gongu, um at ansa sær í hálkuni. 

Sambært vakthavandi er serliga hált í Suðurstreymoy, og bæði Landsverk og Tórshavnar Kommuna hava fingið boðini og eru farin at salta vegirnar. 

Fyri løtu síðani boðaði Landsverk frá á heimasíðuni, at hált er í støðum um alt landið. Framvegis er ikki koyrandi til Gjáar, og á Vestmannavegnum eru vánalig koyrilíkindi.