Trailaravognar umborð á Akranesi fingu skaða

Farmaskipið Akranes hjá Smyril Line kom í illveður í farvatninum millum Føroyar og Ísland í gjár. 

Akranes var á veg úr Torlákshøfn í Íslandi við fiski, tá skipið kom í illveður.

Fleiri trailaravognar umborð hava forskotið seg og hava fingið skaða, upplýsir Jens Meinhard Rasmussen, stjóri í Smyril Line.

Sambært Jens Meinhard Rasmussen var tó ongantíð vandi á ferð fyri skipið, og eingin fólkskaði var umborð.

Akranes, Smyril Line, Bingjur koppaðar

(Mynd: Hallur Thomsen)

Akranes, Smyril Line, Bingjur koppaðar

(Mynd: Hallur Thomsen)

Men talan er um materiellan skaða, ið stóðst av at trailaravognar, sum annars eru væl bundnir fastir í dekkið, slitu og hava forskotið seg.

Akranes er nú komin á Havnina, og í løtuni eru fólk frá Smyril Line við at fáa yvirlit yvir skaðarnar umborð. 

Akranes skal víðari til Rotterdam í Hollandi. Skipið skuldi sambært ferðaætlanini vera í Rotterdam klokkan sjey í annaðkvøld, lokala tíð, men verður væntandi eitt samdøgur seinkað, sigur Jens Meinhard Rasmussen.