Rubio lovar Netanyahu treytaleysan stuðul

Nýggi amerikanski uttanríkisráðharrin, Marco Rubio, lovar ísraelska forsætisráðharranum, Benjamin Netanyahu, treytaleysan stuðul.

Teir báðir tosaðu í telefon í gjár, upplýsir amerikanska uttanríksráðið.

Telefonfundurin kom í lag, tí Marco Rubio vildi leggja dent á, at treytaleysi stuðulin hjá USA heldur fram óbroyttur, og hevur hægstu raðfesting hjá Donald Trump, forseta.

Ynskti til lukku

Nýggi amerikanski uttanríkisráðharrin nýtti eisini høvið at ynskja Netanyahu til lukku við góðu avrikunum í stríðnum móti Hamas og Hisbollah.

Marco Rubio lovaði eisini, at hann fer at gera alt, sum er í hansara valdi, at fáa gíslarnar, sum eru eftir í Gasa, leysar, skrivar Ritzau.

Vápnahvíldin millum Ísrael og Hamas kom í gildi sunnudagin, eftir at partarnir hava stríðst ímóti hvørjum øðrum í 15 mánaðir.