Bráskipanin á matstovum kemur í gildi 1. mars

Nú nærkast dagurin, tá matstovur skulu hava úrslit frá eftirlitum hjá Heilsufrøðiligu starvsstovu hangandi á sjónligum staði beint við inngongdina.

Kunngerðin um tað kemur í gildi 1. mars.

Matstovurnar skulu hava ein brámynd, ein smiley, sum sigur, hvussu matstovan er.

Talan kann vera um eitt fegið brá, strangt brá ella misnøgt brá. 

Tey skulu skjótt og lætt geva fólki kunning um heilsufrøði, matvørutrygd, reinføri og annað hjá matstovuni. 

Hetta er skipan, sum er roynd í til dømis Danmark og Noregi.

Matstova barr vín

Heimild í matvøurlógini

Kunngerðin, sum kemur um góðan mánað, hevur heimild í matvørulógini.

Hóast kunngerðin eftir ætlan kemur 1. mars, vera fyrstu eftirlitini eftir skipanini ikki gjørd fyrr enn nakað seinni, sigur Heilsufrøðiliga starvsstovan.

Áðrenn skipanin verður sett í verk, og fyrstu eftirlitini eftir nýggju skipanini vera gjørd, verður nærri kunning send vinnuni, sigur Heilsufrøðiliga starvsstovan.

Kunngerðin er galdandi fyri virksemi, sum hevur løggilding eftir reglunum í kunngerð um løggilding og skráseting av matvøruvirkjum.