FSF: "Leikaraleiðin" kveikt venjaraneistan

Um vikuskiftið endaði fyrsta royndin við sonevndu leikaraleiðini hjá Fótbóltssambandi Føroya. Eitt nýtt venjaraskeið fyri fyrrverandi og núverandi fótbóltsspælarar, sum hava royndir frá hægri stigi í Føroyum og uttanlands.

Góðir 30 spælarar vóru við, og ein av teimum var landsliðsspælarin úr KÍ, Odmar Færø, sum letur væl at.

 - Hetta var eitt læruríkt tíðarskeið, við sera góðum undirvísarum. Tað er stórur munur at vera spælari og venjari, og tað kom eisini greitt fram á skeiðnum, sigur Odmar Færø, ið umhugsar at fara venjaraleiðina, tá hann einaferð gevst at spæla fótbólt.

 - Ja, tað rokni eg við at eg fari. Tað verður í øllum føri ringt at sleppa fótbóltinum heilt, so tað er als ikki óhugsandi at eg gerist venjari, og tá verður hetta skeiðið heilt víst í amboðskassanum, sigur miðverjin við heimasíðuna hjá FSF.

Fótbóltssambandið fegnast um góðu undirtøkuna, og nú verður umhugsað at hava eitt líknandi skeið fyri kvinnur, ið hava royndir frá hægri stigi sum spælarar.

 - Hetta var eitt sera áhugavert og spennandi skeið, ið hevði til endamáls at fáa fyrrverandi og núverandi spælarar at luttaka, og tað eydnaðist eisini til fulnar. Vónandi hava vit kveikt ein neista, so fleiri av hesum fara á B4 venjaraútbúgvingina, sum eftir ætlan byrjar í vár, sigur Jógvan Martin Olsen, ið var ein av undirvísarunum á “Leikaraleiðini”.

Millum núverandi og fyrrverandi spælararnar, sum vóru við á nýggja venjaraskeiðnum, kunnu nevnast Rógvi Jacobsen, Hallur Hansson, Klæmint Andrasson Olsen og Sámal Joensen.