Undrast á raðfestingar hjá ákæruvaldinum

Landsstýrismaðurin í lógarmálum undrast á summar raðfestingar hjá ákæruvaldinum í Føroyum.

Tað er eisini sera óheppið, at løgreglan og ákæruvaldið brúka langa tíð at avgreiða ávís mál.

Tað sigur Bjarni Kárason Petersen, landsstýrismaður, sum hevur svarað spurningi frá Eiriki í Jákupsstovu, løgtingsmanni.

Les svarið her.

Hann spurdi, hvussu danskir myndugleikar loysa sínar uppgávur í Føroyum, og hvørja kunning, landsstýrismaðurin fær um virksemið og støðið hjá donsku myndugleikunum her.

Bjarni Kárason Petersen sigur, at Løgmálaráðið fær javnan kunning um virksemið hjá løgregluni og ákæruvaldinum.

Bjarni Kárason Petersen

Bjarni Kárason Petersen. (Mynd: Bjarni Árting Rubeksen)

Nógvir fundir

Hann hevur fýra fundir um árið við fútan. 

Embætisfólk í Løgmálaráðnum hava regluligar fundir við embætisfólk í danska løgmálaráðnum.

Løgmálaráðið hevur fýra støðufundir um árið við Justitsministeriet, har millum annað aktuell mál og mál á ikki yvirtiknum økjum vera umrødd. 

Løgmálaráðið er eisini í Politiøkisráðnum, sum hevur fýra fundir um árið.

Hetta landsstýrið hevur onga ætlan um at yvirtaka løgreglu og dómsvald, sigur landsstýrismaðurin.

Kunningin, sum landsstýrið fær frá ríkismyndugleikunum, er batnað nógv seinastu  árini, sigur hann.