Maria hjálpir kvinnuligum íverksetum

- Íverksetan snýr seg ikki um at hava alt perfekt ella allan vitan frá byrjan av, men um at handla og laga tað til á leiðini.

Soleiðis sigur Maria Fagranes Clemmensen, sum seinastu seks árini hevur verið íverkseti uttanlands. Í dag arbeiðir hon fyri Tech Nordic Advocates, har hon serliga ráðgevur kvinnuligum íverksetum, sum vilja royna seg í KT-vinnuni.

Fyri Mariu Fagranes Clemmensen er umráðandi at fáa fleiri kvinnur inn í KT-vinnuna.

- Hyggur mann at tøkni, so er tað er júst har, at nýskapan hendir í dag. Beint nú eru tað mest menn, sum standa aftan fyri hesa nýskapanina, og tað er ein trupulleiki, sigur Maria Fagranes Clemmensen og heldur fram:

- Sambært ymsum kanningum vísir tað seg, at um bæði kvinnur og menn eru aftan fyri hesa nýhugsanina, ja so eydnast verkætlaninar betur. Tí er tað umráðandi at fáa kvinnur inn í hesa vinnuna, sigur Maria Fagranes Clemmensen, sum í fleiri umførum eisini sjálv hevur roynt seg sum íverkseta.

Í morgunsendingini greiðir Maria Fagranes Clemmensen eitt nú frá arbeiðinum, har hon ráðgevur kvinnuligum íverksetum, og eisini fortelur hon um sína egnu íverksetaraferð.