Vit gita: Fýra broytingar á liðnum

Føroyar taptu leygarkvøldið 2-1 móti Kekkia í HM 2026 undankappingini.

Týskvøldið spælir føroyska liðið annan dystin í bólkaspælinum. Hann er á útivølli móti Montenegro.

Tað gekk illa at gita liðið seinast, og tað er ikki vist, at tað gongur betri hesa ferð.

Tað eru fleiri spælarar um boðið og venjaratoymið heldur kortunum tætt at kroppinum, men tað eru ábendingar um upp til fýra broytingar á liðnum.

Hallur og Árni uttanfyri

Tað er ókeypis at gita fyrstu broytingina.

Jann Benjaminsen bleiv skaddur í dystinum móti Kekkia, tí hann beklaði illa. Hóast hann enn er við á ferðini og fær runnið, so hevur landsliðsvenjarin úttikið Martin Agnarsson í staðin. 

Á miðjuni ljóðar, at René Shaki Joensen og Meinhard E. Olsen fáa kjansin frá byrjan.

Eyðun Klakstein hevur boðað frá, at hann ikki er bangin fyri brúka fleiri spælarar í hópinum. Vit gita, at Hallur Hansson og Árni Federiksberg verða teir, sum detta uttanfyri.

Ikki spælt seg av liðnum

Hallur Hansson er fyri kortum komin fyri seg eftir drúgvan skaða, og hevur eitt knæð, ið hann skal ansa eftir. Árni Frederiksberg er við fyri fyrstu ferð í fimm ár og spældi frá byrjan í Kekkia. 

Tað er ikki tí, at Árni ella Hallur hava spælt seg av liðnum, men meira tí tað sita góðir spælarar á bonkinum.

Um Meinhard E. Olsen ella Adrian Justinussen koma inn, so er sannlíkt at Hanus Sørensen verður fluttur úr vinstru til høgru á miðvøllinum.

Spurningurin um áleypara og málverja?

Stóru spurningarnir eru í báðum brotsteigunum. Halda Bárður á Reynatrøð og Petur Knudsen fast í plássunum?

Tað er ikki vanligt at skifta málmann, uttan at tað er alneyðugt, men okkurt bendir á, at Mattias H. Lamhauge fær kjansin í morgin. 

Hetta er annars nakað, sum vit kunnu vænta at Montenegro fer at gera í morgin. Her í Podgoricia skriva miðlar, at landsliðsvenjarin, navnframi Robert Prosinečki, ætlar at gera júst tað.

Tá er meira vanligt, at venjarar skifta út á fremstu rekkju, men Petur Knudsen sær út til at halda fast í tí.

Við nøkrum ábendingum fara vit at gita liðið. Størstu ivamálini eru málverjin, vinstri vongur og áleyparin.

Vit gita: (Føroyar 5-4-1)

Mattias H. Lamhauge – Jóannes K. Danielsen, Odmar Færø, Gunnar Vatnhamar, Andrias Emundsson, Viljormur Davidsen – Hanus Sørensen, Brandur Hendriksson, Réne Shaki Joensen, Meinhard E. Olsen – Petur Knudsen

Føroyar móti Montenegro