Betri marknaðaratgongd í Kina

Føroyskir útflytarar fáa nú betri marknaðaratgongd til Kina.

Føroyar og Kina hava skrivað undir tvær heilsufrøðiligar protokollir um veiddan fisk, fiskalýsi og fiskamjøl.

Tað merkir at Føroyar nú kunnu útflyta øll fiskasløg, rækjur og skeljar til Kina, og at makrelprotokollin frá 2016 er sett úr gildi.

Heilsufrøðiliga starvsstovan arbeiðir við at fáa eina góðkenda heilsuváttan til fiskamjøl og lýsi til Kina. 

Fleiri vørusløg

Eisini skulu øll virki og skip, sum útflyta til Kina, vera á góðkendum lista, men hetta er ikki endaliga góðkent av kinesiska myndugleikanum enn.

Við nýggju protokollunum verður marknaðaratgongdin til Kina víðkað til fleiri vørusløg enn fyrr,  og sambært landsstýriskvinnuni er tað eitt týdningarmikið stig í at betra um handilsviðurskiftini millum londini.

Landsstýriskvinnan í uttanríkis- og vinnumálum, Sirið Stenberg, er í hesum døgum í Bejing í Kina.