Fótbóltskvinnurnar: Tryggjaðu sær 2. plássið

Ásla Johannesen skeyt føroyska málið, tá fótbóltslandsliðið spældi 1-1 á útivølli ímóti Moldova og tryggjaði sær 2. plássið í sínum bólki.

23 minuttir vóru spældir, tá føroyski liðskiparin legði Føroyar á odda, men Iuliana Colnic javnaði átta minuttir fyri steðgin.

Einki mál kom afturat, og framherjin Heidi Sevdal mátti málleys av vølli í dysti nummar 95 fyri A-landsliðið. Hon hevur nú spælt flestar A-fótbóltslandsdystir fyri Føroyar saman við Fróða Benjaminsen.

Føroyar hava 10 stig, nú bert ein dystur er eftir at spæla í Nations League. Tann dysturin verður á Tórsvølli týsdagin, tá oddaliðið Slovakia, sum hevur fult stigatal við 15, vitjar.

Moldova hevur 4 stig á 3. plássi, meðan Gibraltar einki stig hevur fingið.