Nýggj skrá til summarhálvuna

Í summar kanst tú njóta góðar sendingar – um tú ert við grillina, í fjøllunum ella bara slappar av í summarhúsinum. Kringvarpið sendir bæði beinleiðis í útvarpi og sjónvarpi, og alt tilfarið verður eisini tøkt á kvf.fo, so tú kanst lurta og hyggja, tá tað passar tær best. 

millum_tokini_1920x1080.png

Caption: 

Millum tøkini er ein av nýggju útvarpssendingunum í summar (Grafikkur: Høgni Egholm Magnussen)

Frískar røddir og kendir vertir í summarskránni 

Í útvarpinum verður summarið merkt av løttum og hugnaligum sendingum við práti, gestum og tónleiki. Tú kanst gleða teg til eitt frískt íkast av nýggjum røddum, sum bera eitt summarligt lot við sær. 

Millum annað verður nýggj kappróðrarkjaksending – Millum tøkini – við Ludvík við Stein, har vit fara at hoyra um manningarnar, kappingina og stemningin í róðrarheiminum. 

Góðan morgun Føroyar heldur fram alt summarið, men fær ein lættari dám og eitur nú Summarmorgun við skiftandi vertum. Eisini her verður pláss fyri kappingum og summarligum evnum. 

Skratsj, Tróndur Vatnhamar, Kringvarp Føroya

Caption: 

Mynd: Bjarni Árting Rubeksen

Ikki alt fer í dvala 

Nakrar av best umtóktu sendingunum halda fram sum vant. Tit skriva vit spæla (TSVS) heldur fram at spæla lurtaraynskir. Kallið gevur rúm fyri dýpd og hugsan um átrúnað, meðan Vikuskiftið bjóðar eina avslappaða og viðkomandi samanrenning av tónleiki, gestum og samrøðum um, hvat rør seg um vikuskiftið. 

Hetta eru sendingar, sum hava funnið sítt fasta pláss hjá lurtarum – og verða verandi á skránni í summar. 

Kappróður 10mf

Caption: 

Mynd: Bjarni Árting Rubeksen

Gull úr sjónvarpssavninum

Í sjónvarpinum síggja vit aftur nógv gull úr savninum við summarligum innihaldi. Sendingar sum Urtagarðurin og Nú grør, har vit vitja urtagarðar kring landið, snúgva seg um summardagar í føroysku náttúruni. 

Eisini verður nógv spennandi sent beinleiðis í sjónvarpinum. Vit senda frá landsdystum í fótbólti, kappróðri kring landið og sjálvandi eisini frá teimum størstu løtunum á ólavsøku. Tú kanst gleða teg til at síggja skrúðgonguna, gudstænastuna, løgmansrøðuna og alla ta hátíðarligu skránna, sum hoyrir ólavsøkuni til. 

Dagur og vika og Gekkurin skifta til summartíð eftir viku 26. Frá 1. juli verður Dagur og vika send týs- og fríggjakvøld, og Gekkurin verður fluttur til týskvøld beint eftir Dag og viku. Í sama tíðarskeiði fer 3-2 í summarsteðg og er aftur í september. 

surligt_summar_mynd.png

Caption: 

 Rannvør F. Eyðunsdóttir, David Thomassen og Bárður Petersen er vertir í ungdómssendingini - Súrligt summar

Tey ungu koma aftur

Bárður Petersen, David Thomassen og Rannvør F. Eyðunsdóttir eru aftur í Føroyum, og hesa ferð hava tey Hendrik Jacobsen við sær sum reportara í nýggju útvarpssendingini Súrligt summar. 

Talan er um eina sending við undirhaldi, samrøðum og tónleiki – alt í einum summarligum og livandi tónalagi, ætlað ungum og ungum í sinni. 

Tey fara at senda beinleiðis 3 dagar um vikuna frá 15. juli til 14. august. 

poppverturin_1920x1080.png

Caption: 

Poppverturin - Nýggj tónleikasending við Jákupi Magnussen (Grafikkur: Høgni Egholm Magnussen)

Summartónar í útvarpinum 

Í útvarpinum er nógvur tónleikur. Vit leggja dent á festivaltónleik, nýggjar útgávur og summarhitt, sum seta dám á longu kvøldini. 

Á skránni eru eisini nýggjar tónleikarøðir, eitt nú Poppverturin við Jákup Magnussen og Sangir úr mínum lívi, har skiftandi vertir velja og greiða frá sínum tónleikavalum – ein sending, sum sameinir tónleik, minnir og persónligar søgur.