Arbeiðsgevarar skulu krevja útlendingar eftir revsiváttan

Arbeiðsgevarar og ikki Útlendingastovan eiga at krevja revsiváttan frá útlendingum, sum koma til Føroya at arbeiða.

Tað er, um krav verður um slíka váttan.

Tað er ikki avgjørt enn, men spurningurin verður viðgjørdur.

Beinir Johannesen, løgtingsmaður, spurdi Bjarni Kárason Petersen, landsstýrismann, um revsiváttan.

Landsstýrismaðurin svarar, at Útlendingastovan mælir til, at arbeiðsgevarar krevja revsiváttan.

Skal Útlendingastovan krevja revsiváttanir, fer tað at seinka málsviðgerðina hjá Útlendingastovuni alt ov nógv, tí revsiváttanir skulu tá váttast hjá viðkomandi útlendskum myndugleikum.

Løgmálaráðið hevur eisini spurt Udlændinge- og Integrationsministeriet. 

Tað hevur boðað frá, at tað heldur ikki, at tað er í stríð við ásetingarnar í føroysku útlendingalógini, at ásett verður í løgtingslóg, at arbeiðsgevarar skulu krevja revsiváttan.

Bjarni Kárason Petersen sigur, at eftir summarfrítíðina verður gjørt lógaruppskot við krøvum til arbeiðsgevarar, millum annað krav um revsiváttan, tryggingar og málførleika.

Arbeiðið at gera nýggja útlendingalóg fyri Føroyar er í gongd og verður væntandi liðugt komandi summar, sigur landsstýrismaðurin.