Heim til fólk við autismu byggjast á Argjum

Ætlanin at byggja eitt nýtt sambýli til fólk við autismu kemur nú í løgtingið.

Sambært løglistanum verður uppskot um verklagslóg lagt fyri løgtingið í heyst.

Talan er um eitt sambýli til vaksin fólk við autismu. Tað skal byggjast við Rygsá á Argjum. Sambýlið verður bygt í fýra eindum, og er til 24 fólk. Seks fólk skulu búgva í hvørjari eind.

Sambært løglistanum skal bygningurin vera liðugur á vetri í 2027. Einki verður nevnt um, hvat bygningurin er mettur at kosta.

Landsverk er longu farið undir fyrireikingarnar, eitt nú er lendis- og spreingiarbeiðið bjóðað út.