Yvirtaka rúsandi evni og tvingsil í psykiatri

Tvær yvirtøkur eru ætlaðar í tingsetuni, sum júst er byrjað.

Landsstýrið ætlar at yvirtaka málsøkini rúsandi evni og tvingsil í psykiatri.

Tað verður gjørt við støði í álitinum um møguliga yvirtøku av uppgávunum hjá landslæknaembætinum og ávísum øðrum málsøkjum. 

Heilsumálaráðið fyrireikar uppskotið, sum løgmaður leggur fyri løgtingið í vár. 

Og málsøkið flogferðsla skal eisini yvirtakast.

Tann yvirtøkan verður gjørd í stigum, so einstøku partarnir í málsøkinum koma á føroyskar hendur, so hvørt føroyskir myndugleikar í samskifti við danskar myndugleikar taka ábyrgd av teimum. 

Býta økið sundur

Treytin er, at danskir myndugleikar fáa sær heimild at býta málsøkið flogferðsla sundur.

Lógaruppskot um tað fer væntandi í fólkatingið í heyst. 

Uttanríkis- og vinnumálaráðið fyrireikar uppskotið um at yvirtaka flogferðsluna.

Løgmaður leggur uppskotið fyri løgtingið í heyst, stendur í løglistanum hjá landsstýrinum.