Ljóðbrot: KÍ víðari til triðja umfar

KÍ fer víðari til triðja umfar í Conference League, eftir ein 1-0 sigur móti serbiska Radnicki í gjárkvøldið.

Einasta málið kom beint fyri hálvleik, og tað var eyðkenda KÍ-uppskriftin, sum enn einaferð riggaði, tá Árni Frederiksberg skeyt eitt hart og gott hornaspark innfyri, sum Páll Klettskarð fekk pannuna á, og stýrdi í málið.

Bæði Árni Frederiksberg og Páll Kletsskarð søgdu eftir dystin, at í evropeiskum dystum fær KÍ ikki nógvar málmøguleikar, men at liðið leggur nógva áherðslu á deyðbóltar - eitt nú hornaspørk.

Næsta umfar skal KÍ spæla ímóti Neman Grodno úr Hvítarusslandi, og tann dysturin verður longu týskvøldið á Tórsvølli.

HB tapti tepurt

Á Brøndby Stadion mundi HB givið heimaliðnum ein hvøkk móti dystarenda, men Brøndby vann dystin 1-0 við máli, sum japanski Shō Fukuda skeyt, tá 31 minuttir vóru farnir.

Hóast Brøndby hevði bóltin mest, so var líka við, at HB endurtók bragdið á Tórsvølli móti dystarenda. Í yvirtíðini hevði HB fleiri møguleikar, men neyvleikin og hepnið var ikki við teimum. 

Gamal kenningur

Víkingur kennir nú eisini sína mótstøðu í triðja umfari av Conference League, og tað er ein gamal kenningur, sum aftur vitjar í Føroyum.

Linfield úr Norðurírlandi vitjar Tórsvøll tann 7. august.