Fáa 3.200 kr. aftrat fyri at ansa sjúkum heima

Fólk, sum missa arbeiðsinntøku, tí tey noyðast at vera heima og ansa sjúkum fólki, fara at fáa góðar 3.200 kr. meira um mánaðin frá tí almenna.

Gjaldið er nú 27.779 kr. um mánaðin.

Tað verður 31.000 kr. á nýggjárinum, ætlar Eirikur í Jákupsstovu, landsstýrismaður.

Hann hevur gjørt uppskot um lógarbroyting, sum er sent til hoyringar.

Verandi skipan ger, at nógvar familjur missa inntøku.

Hon ger, at fíggjarlig atlit avgera, hvussu familjur leggja ansingina til rættis.

90 prosent kvinnur

Næstan 90 prosent teirra, sum fáa veitingina, eru kvinnur.

Millum 90 og 100 fólk fáa endurgjald fyri mista arbeiðsinntøku.

Hækkingin kostar landskassanum eina til tvær milliónir um árið. 

Harafturímóti verður hámarksupphæddin ikki javnað í 2026.

Tað ger, at landskassin sparir 500.000 til 700.000 kr.