Vit gita: Hetta verður liðið móti Kroatia

Tað er í annaðkvøld klokkan 19.45, at Føroyar taka móti Kroatia á fyrsta sinni. Vit hava tó spælt móti Jugoslavia í 1991, áðrenn Kroatia bleiv sjálvstøðug tjóð. Tá taptu vit 7-0 og 2-0. Eyðun Klakstein og hansara menn hava eina venjing nú seinnapartin, so tað er ikki vist at liðið er endaliga sett, men her gita vit liðið.

Mattias H. Lamhauge fær kjansin í málinum. Hann hevur spælt fýra dystir í Superliguni í seinastuni. Kroatia er eitt lið, sum kann spæla við nógvum innleggum. Her hevur Mattias munin og tað kundi verið orsøkin til, at hann fær plássið. Um ikki, so er lítil munur á honum og Bárði á Reynatrøð.

Í miðverjuni er lítil ivi um, at tað vera Odmar Færø, Gunnar Vatnhamar og Andrias Edmundsson. Ivamálini eru á vongbakkunum. Velur Eyðun Klakstein at brúka Jann Benjaminsen í hesum dystinum, ella skal Jóannes Kalsø Danielsen spæla frá byrjan. Og hvussu klárur er Viljormur Davidsen. Vit gita, at tað verða Viljormur og Jóannes.

Á miðjuni eru fleiri boð, men vit gita at tað verður Árni Frederiksberg í høgru og Hanus Sørensen í vinstru, meðan Jákup B. Andreasen vinnur dystin við Géza Dávid Turi um plássið við síðuna av Brandi Hendrikssyni.

Tað gevur pláss fyri Meinhardi E. Olsen í álopinum. Ein annar møguleiki er, at Páll A. Klettskarð byrjar í álopinum og Meinhard E. Olsen tekur plássið hjá Hanusi Sørensen. Tað er eisini kapping um plássið á miðjuni og tað hevði ikki verið løgið, um Géza Dávid Turi fekk debut frá byrjan.

Vit gita: (Føroyar 5-4-1)

Mattias H. Lamhauge – Jóannes K. Danielsen, Odmar Færø, Gunnar Vatnhamar, Andrias Edmundsson, Viljormur Davidsen – Árni Frederiksberg, Brandur Hendriksson, Jákup B. Andreasen, Hanus Sørensen – Meinhard E. Olsen