ST-kanningarnevnd: Ísrael fremur fólkamorð í Gasa

Ísrael fremur fólkamorð í Gasa.

Tað er niðurstøðan í frágreiðing, sum ein óheft ST-kanningarnevnd hevur almannakunngjørt í dag.

Nevndin staðfestir, at Ísrael síðani oktobur í 2023 hevur framt fólkadráp í Gasageiranum, við tí í hyggju at beina fyri palestinum í økinum.

- Vit eru komin til ta niðurstøðu, at fólkadráp verður framt í Gasa, at tað heldur fram, og at staturin Ísrael hevur ábyrgdina, sigur  Navi Pillay, leiðari í óheftu, altjóða kanningarnevndini um menniskjarættindi í hersettu palestinsku økjunum, við AP-tíðindastovuna.

Hava eggjað til fólkamorð

Óhefta ST-nevndin staðfestir í frágreiðinginai, sum er almannakunngjørd í morgun, at Benjamin Netanyahu, forsætisráðharri, Isaac Herzog, forseti, og fyrrverandi verjumálaráðharrin, Yoav Gallant, fleiri ferðir hava eggjað til fólkamorð í Gasa.

Ísraelska uttanríkismálaráðið vísir burtur frágreiðingina og kallar hana falska.

Formliga er tað altjóða dómstólurin, ICJ, sum løgfrøðiliga ger av, um fólkadráp verður framt í Gasa.