Kendi svimjarin Pál Joensen vann 2,2 mió. kr. í Gekkinum

Petrina var aftur í kvøld í gávuhýri, tí enn einaferð streyk ein glaður gekkavinnari við stóra vinninginum á hennara vakt. 

2,2 milliónir krónur vóru at vinna, og tað var kendi svimjarin Pál Joensen, ið mangan hevur vunnið Føroyum gull í altjóða svimjikappingum, ið slapp ígjøgnum at snara hjólinum. 

Eins og hann mangan hevur gjørt í svimjingini, so satsaði Pál alt uppá, at hann fór at vinna. Hann lat alla upphæddina, 2,2 milliónir kronur, liggja í gula leypinum. 

Og í øðrum snarinum lukkaðist hjá Páli at raka gula leypin og tær 2,2 milliónir skattafríu krónurnar. 

Spurdur um tað ordiliga var gingið upp fyri honum, at hann hevði vunnið, svaraði Pál, at tað var tað ikki ordiliga. 

"Men konan sær glað út," svaraði fegni vinnarin. 

Hjartaliga tillukku, Pál.