Tjóðsavnið fær goymslu innan Glyvur

Tjóðsavnið fær goymslu innan Glyvur. 

Landsverk og Sjóvar kommuna hava skrivað undir treytað skeyti um, at landið keypir 8.000 fermetrar við forkeypsrætti til aðrar 3.000 fermetrar í Sjóvar kommunu til tað, sum verður kallað varðveitingarmiðstøð hjá Tjóðsavninum. 

Treytin er, at Umhvørvisstovan gevur loyvi til at frábýta økið.

Varðveitingarmiðstøðin skal fyrst og fremst hýsa goymslum hjá Tjóðsavninum.

Tjóðsavn og goymsla

Frá vinstru: Bjarni Seyer Heinesen, byggifrøðingur á Landsverki, Marjun Thomassen, stjóri á Landsverki, Eirikur í Jákupsstovu, landsstýrismaður í almanna- og mentamálum,  Hans Anders Jacobsen, borgarstjóri í Sjóvar kommunu, og Herleif Hammer, stjóri á Tjóðsavninum, sum vóru innan Glyvur og hugdu at grundøkinum, har varðveitingarmiðstøðin hjá Tjóðsavninum verður bygd.

Møguleiki at víðka virksemið

Men rúm verður eisini fyri at víðka virksemið til at hýsa øðrum goymslum, eitt nú listagoymsluni hjá Listasavninum.

Í varðveitingarmiðstøðini hjá Tjóðsavninum innan Glyvur vera grundgoymslur, fornfrøðiligar goymslur, náttúrufrøðiligar goymslur og ymsar smærri sergoymslur, eitt nú til myndir og klæði. 

Har vera eisini móttøkurúm, sóttarhaldsrúm, verkstovurúm, kølirúm, frystirúm, hitarúm og vátrúm.