Bara Sambandsflokkurin vil hækka blokkin

Sambandsflokkurin er einsamallur um uppskot sítt um at hækka blokkin.

Tað sæst, nú álit er komið úr fíggjarnevndini.

Bara nevndarlimurin hjá Sambandsflokkinum tekur undir við uppskotinum.

Sambandsflokkurin vil ikki taka 25 mió. kr. í ár og næsta ár av blokkinum.

Flokkurin hevur uppskot til samtyktar um, at heildarveitingin verður tann sama frá og við 2025, sum hon var í 2024.

50 milliónir meira til vælferð

Um lækkingin í fíggjarlógaruppskotinum fyri 2026 eisini verður strikað, hava vit 50 mió. kr. meira til vælferð, sigur Sambandsflokkurin. 

Pengarnir skulu brúkast til at fíggja eitt annað uppskot hjá flokkinum.

Flokkurin vil hækka barnafrádráttin. Hann skal hækka 4.000 kr.

Tað kostar landskassanum 52 mió. kr. í landsskatti, sigur Sambandsflokkurin.