Svimjing: heimsmet, føroysk met og gull í Íslandi

Føroyskir svimjarar hava av álvara gjørt vart við seg í NM/NJM-kappingini í Íslandi um vikuskiftið. Gull, føroyskt met og heimsmet komu til høldar hjá føroyingunum

Tíggju svimjarar umboðaðu Føroyar til norðurlandameistaraheitini í Ìslandi um vikuskiftið

Mynd: Havnar Svimjifelag

Símun Christian Olsen

01.12.2025 - 13:42

Føroyskir svimjarar gjørdu av álvara um seg, tá kappast var um norðurlandameistaraheitini fyri vaksin, ung og paraíðkarar í Íslandi um vikuskiftið.

Parasvimjarin Oddvá Sedea Nattestad úr Havnar Svimjifelag gjørdi ikki mætari enn at seta trý heimsmet á stevnuni, sum var í Laugardalshøllini í Reykjavík.

Tey komu í 50 metur frí (0.30.34), 50 metur bringu (0.37.81) og 100 metur bringu (1.26.27). Oddvá Sedea Nattestad svimur í einum lutfalsliga nýggjum bólki, S19, sum er fyri fólk við vælfungerandi autismu.

Andrias Mellemgaard (HS) svam í bólkinum S9, sum er fyri fólk við minni rørslutarni. Hann setti fleiri persónlig met.

oddva_ok.jpg

Frítekst tagging:

Ítróttur

Svimjing

Oddvá Sedea D. Nattestad

Oddvá Sedea Nattestad úr Havnar Svimjifelag gjørdi ikki mætari enn at seta trý heimsmet á NM/NJM-stevnuni í Reykjavík um vikuskiftið (Mynd: Havnar Svimjifelag)

Eitt gull og tvey føroysk met

Isak Brisenfeldt (HS) svam eisini væl um vikuskiftið. Ungi HS-svimjarin vann gull í 200 metur firvald við tíðini 1.59.01, sum eisini er føroyskt met.

Í juniorbólkinum vann Líggjas Joensen silvur í 200 metur frí, og Lea Osberg Højsted (Ægir) svam seg til bronsumerki í 200 metur bringu við nýggjum føroyskum meti upp á 2:30.72.

Svimjisamband Føroya sendi átta svimjarar til kappingina, meðan Parasport Føroyar sendi tveir. Rúni Gaardbo og Barbara Debes vóru við sum venjarar fyri SSF, meðan fyrrverandi stórsvimjarin Katrin Dagbjartsdóttir var venjari fyri Parasport Føroyar.