Minni avgjald á leyst snús

Avgjaldshækkingin á Primasnúsi skal minka.

Tað er endamálið við lógaruppskoti, sum Ruth Vang, landsstýriskvinna, hevur lagt fyri løgtingið.

Tað hevur víst seg, at broytingin í avgaldinum hevur sera stóra ávirkan á leyst snús.

Fyri at kunna taka nakað av avgjaldshækkingini av hesum snúsinum uttan at ávirka annað snús, er neyðugt at nágreina vøruna, sigur Ruth Vang. 

Ikki verður sagt, hvussu nógv avgjaldið minkar.

Men tað stendur í uppskotinum, at uppskotið hevur ongar fíggjarligar avleiðingar fyri landið.

Býtt í tveir bólkar

Snús er býtt í tveir tollbólkar.

Annar er snús, har tubbakk er í.

Í hinum bólkinum er snús uttan tubbakk.

Nú verður nýggjur bólkur gjørdur fyri Primasnús.

Hann eitur leyst snús í pakkum, sum eru 100 gramm ella meira, og minst 45 prosent eru tubbakk. 

Hækkaði tollurin ella avgjaldið er framvegis galdandi frá degnum, boðað var frá hækkingini.

Tað var 30. september.

Lógaruppskotið um Primasnús er gjørt í samráði við TAKS, sigur Fíggjarmálaráðið.

Les uppskotið her.