Føroyar styrkja ukrainsku verjuna

Landsstýrið hevur biðið løgtingið um fýra milliónir krónur í stuðli, ti landsstýrið ætlar at bjóða Ukraina tveir skjótgangandi bátar, sum eru gjørdir í Føroyum.

Samskifti er umvegis donsku verjuna við Ukraina um bátarnar.

Teir kunnu eitt nú nýtast til serdeildir, til sjúkraflutning og annað virksemi hjá ukrainska flotanum.

Brim Boats á Eiði, sum skal byggja bátarnar, sigur, at fyrri báturin kann vera liðugur 10 vikur eftir, at bíleggingin er gjørd. 

Seinni báturin kann latast 10 til 12 vikur eftir fyrra bátin.

Fyrri báturin kostar millum eina og 1,1 mió.kr.

Seinni báturin kostar millum eina millión og 850.000 og eina millión og 950.000 kr.

Fyrri báturin er ein tillaging av einum báti, sum longu er gjørdur.

Seinni báturin hevur meira útgerð og kostar tí meira.

Útgerð

Samskifti er um ítøkiliga útgerð.

Óvissan er 10 til 15 prosent.

Haraftrat skal vera rásarúm fyri at ganga møguligum ynskjum frá Ukraina á møti.

Tí verður biðið um fýra milliónir.

Uttanríkismálaráðið sigur, at tað í breiðari uttanríkispolitiskum høpi er eitt týðandi signal at senda umheiminum, at Føroyar lata útgerð, sum styrkir verjuna hjá Ukraina.