Góðar 24 milliónir til Listasavnið

Landsstýriskvinnan í mentamálum biður løgtingið um heimild at játta 24,3 milliónir krónur til Listasavnið.

Játtanin er ein fortreyt fyri at Listasavnið kann taka ímóti 41 milliónum krónum frá grunnum, sum vilja stuðla arbeiðinum at umvæla og útbyggja Listasavnið.

Sambært lógaruppskotinum fer arbeiðið at kosta tilsamans 70,8 milliónir krónur. Landskassin fíggjar í mesta lagi 24,3 milliónir og Tórshavnar Kommuna stuðlar við 5,5 milliónum. 

Restin kemur frá trimum donskum grunnum. 

Í viðmerkingunum til lógaruppskotið verður víst á, at Listasavnið hevur fingið tilsøgn frá útlendskum grunnum um tilsamans 41 milliónir krónur.

Tvær tilsøgnir um 17 milliónir

Augustinus Fonden og Louis-Hansen Fonden hava givið tilsøgn um 17 milliónir hvør, og Villum Fonden hevur givið tilsøgn um sjey milliónir krónur.

Teir tríggir, donsku grunnarnir seta tó sum treyt, at landskassin eisini átekur sær ein part av fíggingini. 

Við játtanini úr landskassnum hevur Listasavnið fulla fígging til verkætlanini, og harvið kunnu pengarnir frá útlendsku grunnunum verða útgoldnir, stendur í lógaruppskotinum.

Listasavnið hevur fingið byggiloyvi og arbeiðið at umvæla og útbyggja savnið byrjar eftir ætlan í fyrsta ársfjórðingi næsta ár. Eftir ætlan er Listasavnið liðugt útbygt í 2028.