Heidi Sevdal til KÍ

KÍ hevur kunngjørt, at felagið hevur gjørt sáttmála við 36 ára gomlu Heidi Sevdal. Landsliðsáleyparin hevur verið ein ímynd av føroyskum fótbólti í fleiri ár. Við feløgum sum NSÍ, HB, B36 og EB/Str/Skála hevur hon kappast við KÍ, men nú skal Heidi Sevdal skjóta síni mál í Klaksvík.

Heidi Sevdal hevur seinastu seks árini spælt við barndómsfelagnum NSÍ og vunnið bæði steypagull og FM. Felagið hevur havt nakað av frágongd í vetur og nú er greitt, at Heidi Sevdal ikki heldur fram.

- Eg eri ordiliga spent upp á at fara til KÍ, hóast tað sjálvandi eisini er sorgblítt at steðga hjá NSÍ. Tað hevur verið stuttligt at spælt við NSÍ seinastu árini, og tikið kappingina upp við KÍ, sum hevur verið rættiliga einaráðandi í føroyskum fótbólti. KÍ hevur eitt krútsterkt lið, har allar arbeiða hart fyri hvørja aðra, og eg gleði meg at koma inn í ta mentanina hjá KÍ, sigur toppskjúttin frá í fjør í samrøðu á heimasíðuni hjá KÍ.

Í fjør vunnu KÍ kvinnurnar bestu føroysku deildina fyri 24. ferð. Hetta merkir samstundis, at liðið skal spæla Champions League fótbólt í summar.

- Tað er eisini eyka spennandi at KÍ skal spæla Champions League fótbólt í ár. Eg eri sannførd um, at KÍ hevur góðan møguleika at klára seg víðari við tí styrkini, sum liðið hevur, sigur Heidi Sevdal.

Heidi Sevdal hevur verið toppskjútti í føroyskum fótbólti 11 ferðir. Níggju ferðir er hon kosin til ársins spælara. Hon hevur spælt 98 landsdystir.