Stórt smishingálop

Í løtuni herjar eitt stórt og álvarsamt álop í Føroyum í SMS-boðum og telduposti.

Nógv fólk fáa boð við leinkjum, sum royna at lokka persónligar upplýsingar frá teimum. 

Endamálið er at fáa atgongd til gjaldskort ella netbanka fyri at ræna pening.

Tað siga Talgildu Føroyar, peningastovnarnir og politiið í ávaring um smishingálop.

Í SMS-boðunum er eitt leinki. 

Trýsta fólk á leinkið, koma tey á eina heimasíðu, sum líkist veruligari føroyskari heimasíðu, til dømis hjá peningastovni, posthúsi ella nethandli. 

Har vera fólk so biðin um at upplýsa kortnummar, loyniorð ella at rita inn við Samleikanum. 

Ikki trýsta á

Tað er sera týðandi, at fólk ikki trýsta á ókend leinki, stendur á ávaringini.

Myndugleikar og peningastovnar biðja ongantíð fólk um at rita inn ella upplýsa loyniorð gjøgnum eitt leinki í SMS-boðum ella telduposti.

Ráðini til teirra, sum hava trýst á leinkið, eru at rita inn á netbankan og sperra kortini alt fyri eitt.

Ring til peningastovnin, um óregluligt virksemi er í netbankanum.

Er illgruni um Samleikan, eiga fólk at fara undir stillingar og endurnýggja Samleikan og fáa sær nýtt loynital.