33,8 mió.kr. aftrat við aðru viðgerð í dag

H-bygningurin er so at siga liðugur, og umleið 60 prosent av bygninginum er tikin í nýtslu. Men fleiri lekar eru staðfestir í bygninginum, og tað er ein av høvuðsorsøkunum til, at alt virksemið ikki er flutt inn.  Neyðugt er tí at umvæla ella skifta vindeygu, skifta úthurðar umframt annað arbeiði fyri, at bygningurin gerst tættur og verður egnaður til endamálið. Harumframt er talan um nakrar avleiddar skaðar, ið eisini skulu umvælast.

Alt hetta fer at kosta nærum 34 milliónir krónur. At gera ábøtur og umvælingar í H-bygninginum er mett at kosta 32,8 milliónir krónur. Harumframt er 1 millión krónur til gerðarrættarmál og sakarmálskostnað.

Síðani byrjan í 2008 til í dag, hevur fíggjarnevndin fingið upplýst, at tilsamans eru 834,5 milliónir krónur farnar til H-bygningin.

Málið um tær 34 milliónirnar til H-bygningin kemur til triðju viðgerð hósdagin.