Vágskálin: Meistarlig frásøgn um egnan sjúkutilburð

Seinni partur av yrkingasavninum "Sláttrir" eftir Tórodd Poulsen er serligur, tí hann lýsir, hvussu yrkjarin svímar heima, krýpur eftir gólvinum í sjey tímar og verður lagdur inn á sjúkrahús at fáa kvikil í bringuna

Eilen Anthoniussen og Hans Jacob Kollslíð ummæltu "Sláttrir" í Vágskálini seinast, og tey vóru hugtikin av teirri hjartanemandi og speisku frásøgnini, ið Tóroddur hevur skrivað sum ein langan brotprosatekst.

Meistarlig frásøgn

Meðan yrkjarin krýpur eftir gólvinum, hugsar hann bæði um ævinleikan og alskyns hendingar í barndóminum, og hann biður eisini mammu sína um hjálp, hóast hon langt síðan er deyð. 

Ein granni hoyrir neyðarrópini, og eg-persónurin verður við sjúkrabili koyrdur á sjúkrahús. Har verður hann lagdur undir skurð, og av tí, at hann er lokaldoyvdur, fær hann alt við, sum hendir á sjúkrastovuni. 

Eilen Anthoniussen og Hans Jacob Kollslíð halda frásøgnina vera meistarliga frágingna. Teimum dámar eisini væl fyrra part av savninum, har yrkjarin spælir sær við andsagnum, reikar millum dreym og vøku og ofta leggur dent á tað, sum ikki varð. 

Uni Arge leggur Vágskálina tilrættis. 

Vágskálin logo

Hvat: Vágskálin
Hvar: Í útvarpinum og á KVF Ljóð
Nær: Mikudag kl. 16.05, og tá tað passar tær á KVF Ljóð