FMA 2026: "It's been a while" hjá jazzygold er ársins útgáva

"Hendan plátan er søgan um mítt lív. Hon er mín dagbók. Um tú lurtar eftir sangunum, so kennir tú meg ordiliga væl." 

Soleiðis lýsti Jasmin Mote sjálv sína fyrstu útgávu undir pallnavninum jazzygold, "it's been a while", tá hon var gestur í sendingini LEITISSTEIN í útvarpinum 11. februar í fjør. 

Í kvøld hevur "it's been a while" vunnið tann størsta FMA-heiður, "Ársins útgávan", á FMA 2026, sum verður hildið í Norðurlandahúsinum. 

Hinar pláturnar, ið vóru tilnevndar til heiðurin sum "Ársins útgáva" vóru “Í Ævir” hjá Elinborg, “Skull-Sized Kingdom” hjá Lyon Hansen, “Sólskin” hjá Stanley Samuelsen og “Tá hvørt ljós líkist tær” hjá Benjamin Rajani

SÍ EISINI: FMA 2026: Tilnevningarnar

Upp í posa og sekk

Harvið hevur Jasmin Mote aka jazzygold fingið upp í posa og sekk í kvøld, tí hon vakk eisini FMA-heiðurin fyri at hava skrivað ársins sang, "Cake (Baddies Edition)". 

Jazzygold, Jasmin Mote

"It's been a while" er ein sera perónlig útgáva, sum viðgerð evnir sum samleika, eitt nú á sanginum "Homerun". 

Mamman Jasmin er føroysk, meðan pápin er úr Kenja, og tað hevur myndað uppvøksturin hjá Jasmin. 

"Homrun er tann mest persónligi sangurin, ið eg havi skrivað. Hann lovar lurtarunum nokk so langt innum mína persónliga søgu og míni barnaár, og hvussu tað kennist at vaksa upp millum tvær mentanir, og kenna seg nokk so nógv øðrvísi, enn hini børnini í Vestmanna. Men samstundist er sangurin eisini ein kærleiksbræv til mína familju, og tað, ið vit hava upplivað saman."

Jazzygold, Jasmin Mote

Hoyr eisini LEITISSTEIN-sendingina, har Jasmin Mote var gestur og legði "It's been a while" fram fyri fyrstu ferð.