ES klárt við aldursavmarkandi app til sosialu miðlarnar

"Tekniska arbeiðið er liðugt, og í næstum kann appin takast í nýtslu,"  sigur forkvinnan í ES-nevndini, Ursula von der Leyen, á tíðindafundi í dag.

"Endamálið við appini er at verja børn móti skaðiligum tilfari á sosialu miðlunum."

Talan er um eina app, sum kann takast niður, og sum váttar aldurin hjá brúkarum, tá ið talgildar tænastur verða brúktar, sigur ES-nevnarforkvinnan.

Ursula von der Leyen

Forboð í Avstralia

Í desember í fjør setti Avstralia sum fyrsta landið í heiminum forboð í verk, sum noktar børnum og ungum undir 16 ár atgongd til sosialar miðlar.

Men eisini fleiri evropeisk lond hava ætlanir um at avmarka atgongdina hjá børnum og ungum til sosialu miðlarnar, eitt nú Bretland, Týskland, Danmark og Noreg hava víst áhuga fyri líknandi tiltaki.

Eisini nýggja samgongan við Fólkaflokkinum, Sambandsflokkinum og Javnaðarflokkinum hevur sett sær fyri at seta 15 ára aldursmark á sosialar miðlar, sum tað stendur í samgonguskjalinum.

Í morgin hevur franski forsetin, Emmanuel Macron, kallað inn til talgildan toppfund fyri at fáa undirtøku fyri einum evropeiskum uppskoti, sum noktar børnum atgongd til sosialar miðlar.

Tíðliga í ár samtykti franska tjóðartingið eitt lógaruppskot, sum noktar børnum undir 15 ár at brúka sosialar miðlar.